TAKSI

MAR“TAKSI KITA” MA ITA MULI

Adong mada sada bayo alak kita na marpandaraman i Mataram, Pulau Lombok. Bayo on, adong ma sapulu taon lolotna manjalaki hangoluan di si. Dung do mangaranto tu si, ngada jungada dope ia mangulangi tu kampungnia. Songon alak kita si pangaranto sadebana antong, ia pe na marwarung juo do pangomoannia. Sannari madung tolu daganaknia, taiba indukna inda na alak kita, alak Lombok do.

I ma boto carito na dapot si Kulom atia mangecek-ecek ia dot sada bayo alak kita di bandara Soekarno-Hatta. Maso i, si Kulom giot muli tu huta markapal terbang, tai sampe tu Padang do ba parjolo, dung i baruma manengget motor tu Mandailing. Rupana, bayo i pe na giot mulak juo do tu huta ni ibana, i ma tu Huta Jior di Mandailing Tonga-tonga. Ning ia, urang sehat umaknia, i ma so muli ia mangaligisa, mari-ari antong madung sapulu taon ia mangaranto indape na unjung ia mangulangi, ama na santak lungun ilala ia roai.

“Manaek kapal aha do angkang i, tu Padang do sanga tu Medan ?” Marsapa si Kulom.

“Anggo sian Mataram manyogot i, markapal Sriwijaya dau, oni mangubatma kartisku tu Padang marangkat dung kotu Luhur, kapalna Garuda nomor 607”, ning bayo i.

“Bo, au pe i do tenggetonku, nomor piga bangku ni angkang?” Marsapa mulak si Kulom.

“Nomor 6D”, ning bayo i.

“Olontong baya, na palambung-lambung mei juguanta, au nomor 5D, tai angkang i sian topi, i lambung ni tingkap i”, ning si Kulom.

“Olo tile, pas songon na ibuku i ulala, hehehe ...”, ning bayo i laos tata sotik.

“Jadi sian Padang tu huta, manaek motor aha angkang i?” Marsapa mulaki si Kulom.

“I ma da na upikirkon i, indape dapot jau, nangkan marsapa-sapa dope dung lalu tu Padang”, ning bayo i.

“Palanga rap samotor kita, angkang”, ning si Kulom.

“Motor aha langa tenggeton muyu?” Marsapa bayo i.

“Adong langgananku motor taksi ni alak kita, kantorna inda sadia dao jabat sian bandara Minangkabau, mari-ari ra dei partaksi i mangalap kita tu bandara, gorar ni taksinai “Taxi Kita Bersama”, pangurusna di Padang goarna si Kucok marga Rangkuti”, ning si Kulom.

“Bo, pade juo’ntong, nga loja iba be naron pae-paulu manjalaki motor mulak”, ning bayo i.

“Anggo olo do ji angkang i, so utalipon jolo agen ni motor taksi i, so itaraon kalai bangkunta”, ning si Kulom.

“Pukul piga mei marangkatna?” Marsapa bayo i.

“Adong na marangkat pukul lima potang, adong muse na marangkat pukul sambilan borngin, anggo au madung uposan do tiketna marangkat pukul lima”, ning si Kulom.

“Bisa dei rap kita?” Marsapa bayo i.

“Ita sapai antong partaksi i sanga adong dope juguan ambaen ji angkang i”, ning si Kulom.

“Tolong sapai jolo songoni”, ning bayo i.

“Jadima, utalipon jolo partaksi i”, ning si Kulom, oni ibuat ia talipon sian cakunia.

Inda sadia lolot marsambung ma talipon i, oni tarbege sora di si Kulom.

“Taksi Kita, ada yang bisa dibantu”, ninna sora ni alaklai.

“Au don Irfan, get mamosan tiket sadanai marangkat pukul lima potang, adong dope bangku na kosong?” Marsapa si Kulom.

“Adong dope angkang, tai bangku parbalakang doma na dong, ipe sadanai doma”, ning si Irfan panjago loket ni taksi i.

Dung i, marsapa si Kulom tu bayo dongannia i: “Adong dope angkang, tai parbalakang, olo do angkang”.

“Nga pola bia dai, na ponting tolap sigop tu hita an”, ning bayo i antong.

“Biado angkang, olo do?” Marsapa si Irfan mulak.

“Olo, jadi”, ning si Kulom.

Dung i, ipamate ia taliponnia i, oni icakuon ia, baruma mangecek-ecek ia mulak dohot bayo i. Sasaulak tarida rap tata alai nadua.

Nga sadia lolot n’tong be, dung sumbayang kotu Luhur alai na dua, arani kapal terbang i pe antong madung marsiap-siap get marangkatma, alai pe kehe ma tu pintu masuk ni panumpang ni kapal terbang i. Di si tarida madung bahat alak baris marudur. Dung ipareso patugas ni bandara i saguman aha sajo obanon, alak i pe masuk ma sada-sada tu bagasan ni kapal terbang. Pas pukul 13.25, kapal terbang i mardalanma, mur malolot mur maipas, torus mabangma tu ginjang an.

Tar sada satonga jom do, mandarat muse ma kapal terbang i di bandara Minangkabau. Sewa ni kapal terbang i pentong marmijuranma sada-sada: adong na jinjing tasna, adong musengtong umak-umak na mangompa daganakna, ama-ama na manogu-nogu si nuan tunasna, songon i juo tobang-tobang adong na manogu-noguna, bahat muse antong alak i na landang do songoni nida.

Lalu alai tu bagasan ni bandara i, i pintu kaluarnai, mang intema di si partaksi i. Baen na dung somal i antong si Kulom marlangganan, na bulus ma partaksi i mangaroroisa, oni ioban kalai tas dohot barang-barang na ioban ni alai i sude. Dung masuk sude barang-barang obanon i tu bagasan ni motor taksi i, alai pentong masuk muse ma tu bagasan. Panumpang ni motor taksi i bahatna lapan kalak. Dua alak di bangku jolo i samping ni sopir i, tolu alak di barisan bangku na i balakang ni sopir i, oni tolu alaknai muse di bangku parbalakang. Dung juguk sude sewa i di bagasan ni motor taksi i, motor i pe marangkat ma. Biasona, anggo inda dong halanganna, ira-ira pukul sada tonga borngin, sampe mei alai tu Mandailing. [*]

Jakarta, 28 November 2001

Na ni surat ni: Edi Nasution

Boa-boa: tu koum-sisolkotta na mian di pandaraman, pala giot muli tu huta sian Padang adong do motor taksi ni alak kita ima "Taksi Kita Bersama". Alamatna: Jl. Prof. Dr. Hamka No. 43C, Air Tawar Timur, Padang, Telp. (0751) 7051212. Botima !!